中国共产党第二十届中央委员会第四次全体会议公报（彝文）

ꍏꇩꇭꍣꄈꑍꊏꈭꌠꍏꑷꊈꑼꉼ

ꇖꃢꌠꐊꈴꃀꈿꌠꉻꄜ

（2025ꈎ10ꆨ23ꑍꍏꇩꇭꍣꄈꑍꊏꈭꌠ

ꍏꑷꊈꑼꉼꇖꃢꌠꐊꈴꃀꈿꅉꇬꉌꃹꈴꄉꌠ）

ꍏꇩꇭꍣꄈꑍꊏꈭꌠꍏꑷꊈꑼꉼꇖꃢꌠꐊꈴꃀꆏ，2025ꈎ10ꆨ20ꑍꅑ23ꑍꀙꏢꄉꈿ。

ꋌꃢꐊꈴꃀꈿꈽꇁꌠꆹ，ꍏꑷꊈꑼ168ꑼ，ꊁꇱꍏꑷꊈꑼ147ꑼꐥ。ꍏꑷꍬꏦꍤꄻꊈꑼꉼꎮꃷꊈꑼꉼꊈꑼꌋꆀꄚꃆꂮꐥꌠꁁꏯꇬꌄꇤꐋꀨꈧꌠꃀꈿꈽꇁ。ꄈꅿꃀꀉꒉꑍꊏꃢꌠꁧꎁꈐꏭꅉꂫꊐꌠꇬꐋꀨꌋꆀꌧꃀꌧꌺꈨꑌꃀꈿꈽꇁꀐ。

ꐊꈴꃀꆹꍏꑷꍔꍞꏳꁳꊥꇺꎻ。ꍏꑷꊈꑼꉼꊝꎻꏹꑮꏣꀻꆹꅇꀋꂿꑘꌠꉉꀐ。

ꐊꈴꃀꆹꑮꏣꀻꍏꑷꍔꍞꏳꎁꃅꈁꉉꌠꌤꃅꅇꄜꌠꅱꄻꌋꆀꇕꄟꀐ，《ꍏꇭꍏꑷꇩꂱꎆꏣꌋꆀꐧꋦꀻꎆꉬꈎꄐꎖꊯꉬꃢꌠꏤꄻꃆꂮꇖꐨ》ꌌꍤꇖꉌꃹꈴꄉꀐ。ꑮꏣꀻꆹ《ꇖꐨ（ꇕꄟꄯꒉ）》ꌌꐊꈴꃀꏭꉉꀽꀐ。

ꐊꈴꃀꆹꋒꐯꋒꃅꄈꅿꑍꊏꈭꌕꃢꌠꐊꈴꃀꈿꊂꅑꅸꇁꌠꍏꑷꍔꍞꏳꌤꃅꌠꏚꍆꀐ。ꈀꄸꉜꇬꑌ，ꍏꑷꍔꍞꏳꆏꎔꎗꃅꄈꅿ꒜ꀉꒉꑍꊏꃢꌠꌋꆀꑍꊏꈭꈁꐥꃢꌠꐊꈴꃀꉌꊈꃄꌬꑞꅉꑟ，ꎍꐽꅉꇬꄉꀒꁨꆹꌠꎹꌠꌤꃅꈁꉬꅉꃀꉉꈌꌭꈬ，ꐛꒆꃅꊒꌸꃅꐊꑷꃅꀻꎆꉪꉻꀊꏀꌠꃄꌬꈴ，ꏓꇲꃅ“ꉬꑵꋍꉻ”ꉻꄜꄐꉻꄹꎆ，ꋮꄮꃅ“ꇖꑵꐊꑷ”ꄐꇐꄐꉻꄹꎆ，ꇩꈐꇩꉈꃅꇴꄉꉻꀉꒉꑍꂷꌠꏓꇲ，ꀻꎆꌋꆀꋬꂻꌠꏓꇲ，ꀒꁨꋍꁘꃅꐊꑷꃅꃹꅼꃅꄺꀱ，ꏟꈯꃅꊇꁧꀊꂥꃅꀻꎆꌠꄹꇙ，ꐧꋦꉪꏦꋯꁦꏦꏲꋈꄻꌠꄹꎆ，ꊋꀥꇱꄉꉪꇐꁱꀕꄜꉺꌠꌤꃅ，ꃶꐚꃅꉹꁌꐥꐨꏦꀧꌠꌋꆀꒆꉻꋦꈭꀧꌋꃅꌠꒃꉇꋒ，ꇩꏤꋬꂻꌠꌋꆀꐧꋦꎍꐽꌠꀧꌋꃅ，ꃹꅼꃅꍏꑷꏤꐪꉆꐘꉌꊈꌶꄻꉙꂘꌠꃄꌬꈴ、ꃹꅼꃅꐊꑷꃅꏦꇨꃅꄈꏱꄻꌠꄹꎆ，ꊋꀥꇱꄉꇩꐏꌋꆀꂽꐛꏀꈴꌠꋈꄻ，ꇤꀎꌤꃅꌠꌋꆀꄠꃪꏭꌤꃅꌠꃅꋒ，ꃹꅼꃅꍏꇩꐛꐨꇩꏤꀉꒉꌠꉇꉻꑌꑲꌠꄹꎆ，ꎆꏣꐪꊛꄉꀱꉾꃪꇁꌠꄹꇙ，“ꊯꇖꉬ”ꁻꌐꂿꃆꀋꉬꀋꉆꌠꆹꊋꐛꃅꃅꌐꂯꄉꀐ。ꈣꒉꃅꍏꇩꏓꂱꏝꀪꏭꄙꌉꌋꆀꋧꃅꃔꑭꌦꏭꁏꌉꊋꐛꌠ80ꈎꈭꏝꐛꌠꎺꄅꄉ，ꀉꇨꐯꀉꇨꃅꊿꋅꉌꊈꄖꄑ、ꇩꉂꉌꊋꄖꄑ、ꉈꈽꊋꃤꏓꋧꀐ。

ꐊꈴꃀꆹꀊꂥꃅ“ꊯꇖꉬ”ꊬꌠꇬꉪꇩꏤꀻꎆꊌꐨꀉꒉꀊꂾꌠꊌꅜꌠꉉꍣ。“ꊯꇖꉬ”ꊬꌠꉪꇩꏤꀻꎆꈴꎁꆹꐋꀋꌡꐯꐋꀋꌡ、ꎃꀋꐚꐯꎃꀋꐚ。ꌼꇪꌼꀖꌠꇩꏹꃅꒊꃅꇁꌋꆀꊋꋠꃣꇖꌠꇩꈐꄺꀱꀻꎆꎍꐽꂿꃆꊝꇬ，ꐋꀨꑮꏣꀻꈯꄜꃅꄉꌠꄈꍏꑷꆏꄈꑭꊂꇩꏤꑭꊂꊿꋅꈁꐥꌠꏓꂱꋌꋯꑌꏃꂠꌊꄉ，ꊋꋠꊝꄉꀒꁨꂵ、ꈐꊟꊋꊡꄉꀒꁨꆹ，ꃅꋊꇵꆅꀉꇨꃅꄜꎟꌠꐕꄽꄉ，ꇿꋌꐥꃅꃨꆰꐨꀉꒉꀊꂾꌠ꒔ꑞ꒔ꑵꋓꎭꌠꊜꄻ，ꄈꌋꆀꇩꏤꌤꑘꄹꇙꌊꊌꐨꀉꒉꀊꂾꌠꀊꏀꌠꊌꅜ。ꉪꇩꏤꎆꏣꊋꃤ、ꈆꑪꇮꇐꊋꃤ、ꏓꇱꇩꊋꐂꀊꏀꊐꇬꃹꆹ，ꍏꇩꈁꏦꐛꏀꈴꌠꑭꁘꀊꏀꌠꐕꈬꃅꐕꎼꆹ，ꉐꈎꑍꂷꂶꌠꉈꈽꁻꌐꈭꈜꀊꏀꌠꇬꂂꄻꂂꌠꃅꇫꑟ。

ꐊꈴꃀꄐꌐꎼꇁꇬ，ꐧꋦꉪꏦꐛꏀꈴꌠꃅꇫꑟꌠꆹꅂꊐꌡꃅꊛꄉꁨꆹ、ꀋꆏꃅꀻꎆꁨꎆꌠꐩꋊꈴꎁꏢꉬ，ꀋꆏꃅꊋꇤ、ꊛꄉꉈꈽꄻꅐ。“ꊯꉬꉬ”ꊬꌠꆹꀑꐱꃅꐧꋦꉪꏦꐛꏀꈴꌠꃅꇫꑟꌠꇬꅉꃀꌆꈬ、ꐊꑷꃅꊋꇤꌠꀋꉬꀋꉆꑠꊭꉬ，ꀑꐱꃅꐧꋦꉪꏦꐛꏀꈴꌠꃅꇫꑟꌠꆹꎁꇬꂴꊪꊂꊛꌠꉆꈉꀋꂿꑘꌠꐥ。“ꊯꉬꉬ”ꊬꌠꉪꇩꏤꀻꎆꋦꈭꆹꃹꅼꃅꌼꇪꃅꐛꐈꌠꊝ，ꉪꇩꏤꀻꎆꌠꆹꄐꇐꏤꁈꊜꋽꄮꌋꆀꃨꆰꐨꋓꎭꌠꋍꋓꃅꐥ、ꊨꀋꄅꄤꎖꊋꌠꐊꊈꁦꎆꇁꑠꊭꇬꎍ。ꉪꇩꏤꎆꏣꅉ꒜ꎍꐽ、ꂱꎆꅑꐨꀉꑌ、ꍕꎇꐨꀉꇨ、ꊋꂫꀉꒉ，ꀊꉗꃅꉾꆹꌠꄘꄏꇎꏦꌋꆀꅉꀨꆸꄟꐛꀋꐈ，ꍏꇩꐛꐨꐧꋦꉪꏦꄹꏦꂱꎆꅑꐨ、ꄉꈁꀉꒉꐯꀉꒉꌠꃷꎏꂱꎆꅑꐨ、ꐛꒆꌠꅐꑘꉻꑫꂱꎆꅑꐨ、ꀉꑌꌠꌧꊿꅐꀦꂱꎆꅑꐨꀊꅰꃅꇫꅐꇁ。ꄈꑭꊂꃅꃹꅼꃅ“ꑍꑵꏤꄻꄉ”ꌠꏤꇽꐨꐥꌠꈻꇐꉪꐚ，“ꇖꑵꉪꐨ”ꀉꇨꇱ、“ꇖꑵꑴꑇ”ꌠꑌꈬ、“ꑍꑵꀧꌋꃅ”ꌠꃅꇫꑟ，ꄐꇐꏤꁈꏤꊋꄝꀋꊰ，ꊊꎂꀕꌠꉌꊋꀉꇨꇱ，ꏣꀋꑌꃅꐛꐈꌠꌧꐛꐈꌠꊝꐛꐈꌠꎹ，ꉈꈽꀬ、ꉈꈽꇮ，ꀬꅑꃅꆲꁏꒈꂃꄓꌠꄷꀋꁧꒊꊞꃅꃴꂤꌠꀉꒉꀊꂾꃅꎖꉚꌠꏭꊝ，ꐩꋊꑴꇙꉌꊈꌌꊋꋠꌠꑣ、ꃨꆰꌠꄙ、ꋓꎭꌠꊝ，ꊋꃤꏓꋧꄉꊨꏦꌤꀞꋒ，ꐪꊛꄉꎆꏣꐳꃅꀻꎆꌠꌋꆀꐧꋦꀊꉗꃅꎍꐽꌠꊿꋌꇰꌠꀉꒉꋋꑍꐘꀊꏀꁬꁰꄻ，ꊋꇤꄉꍏꇩꈁꏦꐛꏀꈴꌠꋈꄻꌠꐛꊂꀊꏀꌠꀹꄻꌶ。

ꐊꈴꃀꊡꀱꇬ，“ꊯꉬꉬ”ꊬꌠꇬꎆꏣꐧꋦꀻꎆꇬ，ꀋꎪꃅꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨꌭꈬ，ꐊꑷꃅꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꃄꌬꈴ，ꃹꅼꃅꄈꅿ꒜ꀉꒉꑍꊏꃢꌠꌋꆀꑍꊏꈭꈁꐥꃢꌠꐊꈴꃀꉌꊈꃄꌬꈴ，ꐊꑷꃅꐧꋦꉪꏦꐛꏀꈴꌠꇩꏤꐞꄿꌠꋈꄻꐛꌠ、ꉐꈎꑍꂷꂶꌠꉈꈽꁻꌐꃅꇫꑟꌠꇬꆼꒆꄉ，ꍏꇩꈁꏦꐛꏀꈴꌠꌌꐊꑷꃅꍏꉸꊿꋅꇰꀋ꒜ꃅꀱꌄꆣꇁꌠꄹꎆ，ꏓꇲꃅ“ꉬꑵꋍꉻ”ꏓꇱꄐꉻꄹꎆ，ꋮꄮꃅ“ꇖꑵꐊꑷ”ꄐꇐꄐꉻꄹꎆ，ꇩꈐꇩꉈꃅꇴꄉꉻꀉꒉꑍꂷꌠꏓꇲ，ꐛꒆꊒꌸꐊꑷꃅꀻꎆꉪꉻꀊꏀꌠꃄꌬꈴ，ꐳꃅꀻꎆꐛꊂꀊꏀꌠꏓꄻ，ꎍꐽꅉꇬꄉꀒꁨꆹꌠꎹꌠꌤꃅꈁꉬꅉꃀꉉꈌꌭꈬ，ꎆꏣꋈꄻꌠꌌꈯꄜꃅꄉꌠꌭꈬ，ꊇꁧꀊꂥꃅꀻꎆꌠꄹꇙꌠꌌꀨꄜꃅꄉ，ꄺꀱꏀꀺꌠꌌꊇꅉꇙꊋꃅꄉ，ꏓꂱꋍꑍꋍꉙꃅꉀꎆꌠꐥꐨꉾꃪꌠꈉꐨꇬꇎꄻꌠꌌꊇꅉꁻꌐꃅꄉ，ꐊꑷꃅꏦꇨꃅꄈꏱꄻꌠꌌꊇꅉꏦꀧꅍꃅꄉ，ꎆꏣꊇꁧꇿꋌꐥꃅꉀꐕꌠꌋꆀꃷꁨꄉꄐꃅꉀꎆꌠꄹꇙ，ꊿꐊꑷꃅꀻꎆꌠ、ꏓꂱꈁꐥꌠꃅꐯꇯꌣꈚꇁꌠꑭꁘꏟꈯꃅꐕꎼꆹꌠꄹꇙ，ꀑꐱꃅꐧꋦꉪꏦꐛꏀꈴꌠꃅꇫꑟꌠꁨꎆꐨꏤꇽꐨꐥꌠꊌꅜꌠꄉꀧ。

ꐊꈴꃀꄐꌐꎼꇁꇬ，“ꊯꉬꉬ”ꊬꌠꇬꎆꏣꐧꋦꀻꎆꌠꀋꎪꃅꄚꊂꏥꏦꍬꌬꌶ，ꄈꐊꑷꃅꏲꂠꌠꌭꈬ，ꏓꂱꉎꀋꐥꌠꌭꈬ，ꊇꁧꀊꂥꃅꀻꎆꌠꌭꈬ，ꐊꑷꃅꃹꅼꃅꄺꀱꌠꌭꈬ，ꇿꋌꐥꌠꃷꎏꌋꆀꄐꅍꐥꌠꍔꃚꐮꐊꐙꌠꌭꈬ，ꀻꎆꌋꆀꋬꂻꏓꇲꌠꌭꈬ。

ꐊꈴꃀꆹ“ꊯꉬꉬ”ꊬꌠꇬꎆꏣꐧꋦꀻꎆꌠꀋꉬꀋꉆꌠꁻꌐꄜꎼꇁꀐ：ꊇꁧꀊꂥꃅꀻꎆꌠꊌꐨꄇꇖꀕꌠꊌꅜ，ꈆꑪꇮꇐꑴꋦꑴꇨꌠꑟꐨꀉꒉꃅꉀꐕ，ꀒꁨꋍꁘꃅꐊꑷꃅꃹꅼꃅꄺꀱꌠꂵꅐꐨꀊꏀꌠꊌꅜ，ꐧꋦꌧꑳꑟꐨꄇꇖꀕꃅꉀꐕ，ꏓꂱꐥꐨꊇꁧꀋꆏꃅꉀꐕ，ꎔꃨꍏꇩꋈꄻꌠꁨꎆꐨꀉꒉꀊꂾꌠꀊꏀꌠꊌꅜ，ꇩꏤꋬꂻꇊꑴꀊꅰꃅꈫꈈ。ꅉꃀꋋꈨꀂꏽꄉꉈꑴꃅꐎꉬꈎꉈꈽꄉ，ꅑꅸꑍꄙꆀꌕꊯꉬꈎꑟꇬꆏꉪꇩꏤꎆꏣꊋꃤ、ꈆꑪꇮꇐꊋꃤ、ꇩꐏꊋꃤ、ꏓꇱꇩꊋꌋꆀꇩꏹꑌꑲꊋꃤꀉꒉꃅꉀꐕꌠꃅꇫꑟ，ꊾꂷꐽꏡꃅꇬꇩꈐꒃꅐꈁꉬꁌꐨꆏꐧꀠꏠꌠꐞꄿꇩꏤꑟꐨꇬꑟ，ꏓꂱꀊꅰꃅꐥꌒꄻꌒ，ꀑꐱꃅꐧꋦꉪꏦꐛꏀꈴꌠꃅꇫꑟ。

ꐊꈴꃀꄜꎼꇁꇬ，ꐛꏀꈴꅐꑘꉻꑫꋈꄻ，ꐥꄜꎆꏣꐴꊧꄻꀉꇨꄻꈫꈈ。ꎆꏣꀻꎆꌠꊋꏿꅉꄻꐥꄜꎆꏣꀂꏽꐕꄉꌠꌭꈬ，ꀑꊋꃅꐙ、ꀊꃴꃅꐙ、ꐮꏓꐊꃅꐙꌠꃅꍜꌭꈬ，ꐳꃅꄺꑣꀉꇨꌠꇩꏤ、ꊇꁧꀉꇨꌠꇩꏤ、ꃅꈯꐚꈴꀉꇨꌠꇩꏤ、ꈭꈜꀉꇨꌠꇩꏤ、ꈄꏍꀉꇨꌠꇩꏤꋈꄻ，ꄺꂡꑘꍆꐪꋭꋽꌠꄝꀋꊰ，ꂴꅑꄺꂡꑘꌌꈯꌬꃅꄉꌠꐛꏀꈴꅐꑘꉻꑫꏓꄻ。ꋊꃅꅐꑘꄻꃪꉀꐕ，ꏀꄓꅐꑘꌋꆀꃆꏂꊂꑋꅐꑘꉘꉚꀉꇨꇁ，ꁧꃤꃅꑘꊇꁧꉾꃪꇿꋌꀊꂥꃅꀻꎆꌠꊥꎆ，ꐛꏀꈴꅉꃀꉁꈾꉻꑫꏓꄻꌶ。

ꐊꈴꃀꄜꎼꇁꇬ，ꑟꐨꀊꂥꌠꈆꑪꇮꇐꑴꋦꑴꇨꌠꐳꀥꇱ，ꊈꏀꒃꅐꊋꃤꀻꎆꌠꄐꏁ。ꀊꏀꈭꌠꈆꑪꇮꇐꇝꂱꌠꌋꆀꅐꑘꆴꐈꌠꐩꋊꊜꋽꄮꒃꉇꄉ，ꏓꇲꃅꂘꑘꀉꇨꌠꇩꏤ、ꈆꑪꇮꇐꀉꇨꌠꇩꏤ、ꌧꊿꀉꇨꌠꇩꏤꋈꄻ，ꇩꏤꏀꀺꉻꑫꉻꄜꇿꋌꂿꄐꉀꐕ，ꐊꑷꃅꑴꌅꏀꀺꄐꊋꀉꇨꇱ，ꈆꑪꇮꇐꀻꎆꀊꂥꅉꇑꍆꄉ，ꀋꆏꃅꊈꏀꒃꅐꊋꃤꒆꐛꎻ。ꊋꀥꇱꄉꇬꀦꏀꀺꌋꆀꀋꉬꀋꉆꌠꈯꄜꇮꇐꈢꇓꀖ，ꈆꑪꇮꇐꏀꀺꌠꌋꆀꅐꑘꏀꀺꌠꃹꅼꃅꐮꏓꐊꌠꄹꇙ，ꋍꉻꃅꂘꑘꈆꑪꇮꇐꌧꊿꀻꎆꌠꄹꎆ，ꃹꅼꃅꃷꂷꍏꇩꋈꄻꌠꄹꎆꌶ。

ꐊꈴꃀꄜꎼꇁꇬ，ꇩꈐꃷꎏꄻꀉꇨ，ꐳꃅꀻꎆꐛꊂꀊꏀꌠꏓꄻ。ꈒꇓꈉꐨꍔꒉꌠꄐꇐꏤꁈꅉꀨꋋꏢꌭꈬ，ꉹꁌꐥꐨꈲꁵꌠꌋꆀꌬꈧꌠꊥꎆꌠ、ꎊꈬꀂꏽꎆꇱꌠꌋꆀꊿꀂꏽꎆꇱꌠꑖꑟꃅꄻꐯꇯꎼꇁꌠꌭꈬ，ꈉꐨꀊꏀꌠꌌꇲꁵꀊꏀꌠꄐꏁ，ꇲꁵꀊꏀꌠꌌꈉꐨꀊꏀꌠꀹꄻ，ꌬꈧꌋꆀꎆꇱ、ꇲꁵꌋꆀꈉꄻꌠꉾꃪꃅꐮꇙꌠꊥꎆ，ꇩꈐꀉꒉꃅꀰꏮꌠꈒꒆꇙꊋꌋꆀꉘꇉꉆꐨꄻꀉꇨ。ꊋꀉꒉꃅꇤꄉꌬꈧꌠꄖꄑ，ꇿꋌꐥꃅꎆꇱꌠꍔꒉ，ꏟꈯꃅꇩꏤꑭꊂꋍꃱꃅꌠꃷꎏꀉꒉꋈꄻꌠꇬꋍꅉꇊꅉꀜꋊꇧꎭꌶ。

ꐊꈴꃀꄜꎼꇁꇬ，ꐳꃅꑟꐨꀊꂥꌠꐧꋦꉪꏦꃷꎏꎆꏣꏦꉻꋈꄻ，ꊇꁧꀊꂥꃅꀻꎆꌠꇙꊋꀉꇨꇱ。ꐧꋦꉪꏦꅉꀨꎆꏣꄹꏦꌭꈬꌋꆀꄻꉾꃪ，ꀊꅰꉾꃪꃅꎆꏣꏦꉻꄺꀱꈻꏁꂿꄐꋊꇤ，ꉻꒉꎆꏣꏱꄻꉻꑫꄻꉾꃪ，ꊇꁧꀊꂥꃅꀻꎆꌠꄔꐽꎴꏷꌠꄉꀧ。ꋒꐯꋒꃅꋍꑞꋍꉹꀰꏢꀨꄜꍄꑐꊋꃤꄖꄑ，ꐳꃅꐊꊈꃷꎏꈴꄉꁆꄻꌠꏦꉻꉺꏦꄻꉾꃪ，ꉻꒉꎆꏣꏱꄻꇿꋌꉀꐕꌶ。

ꐊꈴꃀꄜꎼꇁꇬ，ꑞꅉꀊꂥꃅꉇꉻꏭꁉꃑꌠꍔꒉ，ꇷꃅꐯꇯꊋꌠꐛꊂꀊꏀꌠꀹꄻ。ꎍꐽꃅꄹꏦꉹꌠꁉꃑꌠꍔꒉ，ꀉꑌꁁꏯꃼꇇꏦꉻꀧꌋꃅ，ꇩꏹꀰꏮꌠꍔꒉ，ꁉꃑꌠꌌꄺꀱꌠꊥꎆꀻꎆꌠꊥꎆ，ꋧꃅꇩꏤꈁꐥꌠꌋꆀꐯꇯꊜꋽꄮꊌ、ꐯꇯꀻꎆ。ꏣꀋꑌꃅꑴꌅꃅꁉꃑꌠꍔꒉ，ꃼꇇꏀꀺꀻꎆꌠꄹꇙ，ꑍꁁꏯꐮꇬꎆꇱꇷꃅꌠꈥꈉꍔꀺ，ꊇꁧꀊꂥꃅꐯꇯ“ꋍꁕꋍꈜ”ꋈꄻꌶ。

ꐊꈴꃀꄜꎼꇁꇬ，ꂿꑘꂿꑘꁡꇤꐛꏀꈴꌠꐳꀥꇱ，ꏟꈯꃅꑣꋂꐊꑷꃅꄖꄑꌄꆣꌠꄹꎆ。“ꌕꂿꑘ”ꌤꃆꂥꀘꋒꌠꌌꄈꑭꊂꌤꃅꌠꀋꂿꑘꐯꀋꂿꑘꌠꃅꄉꌠꌭꈬ，ꇓꈓꇓꉈꐮꏓꐊꄉꀻꎆꌠꊥꎆ，ꐪꊛꄉꎭꇔꈢꇓꀖꌠꊌꐨꄻꈫꈈꍔꐯ，ꂿꑘꁡꇤꀑꐱꃅꀋꃅꋋꄮꐥꐨꇎꏦꐥꌠꄹꇙ，ꐳꃅꂿꑘꀉꇨꌠꇩꏤꋈꄻ。ꂿꑘꏓꇱꒃꅐꄐꊋꌋꆀꊇꁧꈲꁧꉀꐕ，ꀀꌒꃅꌒꌠꎔꃨꑣꋂꋈꄻꌠꄹꎆ，ꂿꑘꀉꇨꂿꑘꈲꁵꂿꑘꌣꈚꌠꏱꁈꇿꋌꉀꐕꌶ。

ꐊꈴꃀꄜꎼꇁꇬ，ꃄꁕꎆꏣꄐꉻꄻꃪ，ꃄꁕꋮꄮꃅꀻꎆꌠꊥꎆ。ꃄꁕꋮꄮꃅꀻꎆꌠꄐꇐꏤꁈ、ꃄꁕꀉꒉꀊꂾꌠꄐꇐꏤꁈ、ꀨꄜꂿꄐꃄꁕꄐꇐꏤꁈ、ꀊꏀꉹꌠꇓꈓꏦꎫꐛꈴꌠꄐꇐꏤꁈꐮꄅꎼꇁꌠꇿꋌꋊꇤ，ꀉꒉꀊꂾꌠꒃꅐꊋꃤꄐꉻꄻꃪ，ꃄꁕꀋꉬꀋꉆꌠꉀꎆꊧꂿꄐꋊꇤꅐꇁ，ꂱꎆꅑꐨꐯꅋꐮꑣ、ꊇꁧꀊꂥꃅꀻꎆꌠꃄꁕꎆꏣꄐꉻꌋꆀꇩꏤꃄꅉꈥꈉꉻꑫꏓꄻ。ꃄꁕꀻꎆꌠꋮꄮꐨꄻꀉꇨ，ꃄꁕꏓꇙꃅꀻꎆꌠꊥꎆ，ꇩꏤꃄꅉꈥꈉꀻꎆꐛꊂꄻꃪ，ꃹꅼꃅꊿꌌꀨꇬꄉꌠꀊꏀꉹꌠꇓꈓꏦꎫꐛꈴꌠꄹꎆ，ꊋꀥꇱꄉꎿꃀꀖꁉꌫꄻꀧꌋꃅꌶ。

ꐊꈴꃀꄜꎼꇁꇬ，ꊿꋅꑭꊂꁱꀕꏀꀺꀹꄻꍄꑐꊋꃤꄖꄑ，ꐧꋦꉪꏦꁱꀕꄻꌄꆣꀻꎆ。ꂷꇻꌦꉪꏦꉪꐨꐛꉻꁁꏯꇬꄐꇺꉆꈉꌭꈬ，ꐴꅿꄖꅼꀉꇨꌠꍏꉸꌧꑳꇬꋦ，ꈴꌗꇮꇐꀻꎆꒈꂃꇬꐊ，ꉪꇐꄐꏁꊋꃤ、ꉌꊈꏓꋧꊋꃤ、ꁌꐨꇳꍝꊋꃤ、ꇩꏹꑌꑲꊋꃤꀉꇨꃅꐥꌠꃅꋊꀊꏀꋎꌠꍏꇩꐛꐨꐧꋦꉪꏦꁱꀕꀻꎆ，ꏟꈯꃅꁱꀕꀉꇨꌠꇩꏤꋈꄻꌠꄹꎆ。ꐧꋦꉪꏦꈯꄜꁌꐨꉜꐨꍔꆙꌋꆀꃄꄻ，ꊋꀉꒉꃅꇤꄉꁱꀕꌤꑘꃅꌊꌄꆣ，ꐳꃅꁱꀕꅐꑘꀻꎆ，ꍏꉸꌧꑳꄜꁊꊋꃤꑌꑲꊋꃤꉀꐕꌶ。

ꐊꈴꃀꄜꎼꇁꇬ，ꉹꁌꐥꐨꏦꀧꌋꆀꄻꃪꌠꇬꊋꃤꀉꒉꃅꇱ，ꏟꈯꃅꏓꂱꈁꐥꌠꃅꐯꇯꌣꈚꌠꄹꎆ。ꊋꈀꑌꃅꇤꄉꃅ、ꊋꎖꄉꃤꀳꌠꌭꈬ，ꊋꀥꇱꄉꈲꈴꃅꐙꌠ、ꅉꃀꃅꐙꌠ、ꂫꑟꀧꃅꐙꌠꉹꁌꐥꐨꋈꄻ，ꏓꂱꉹꁌꃛꊸꊋꋠꐒꊀꉘꇉꌠꌤꃆꂥꀘꋒ，ꐧꋦꏭꇙꈴꈜꄻꁣꀋꐥꃅꄉ，ꏓꂱꐥꐨꊇꁧꉀꐕ。ꊇꁧꀊꂥꃅꋒꐯꋒꃅꃅꅍꊌꌠꊥꎆ，ꊌꐨꁷꄻꄹꏦꄻꉾꃪ，ꏓꂱꉌꃹꌠꂘꑘꀞꋒ，ꐧꋦꏦꀧꉻꑫꄻꐛꒆ，ꑳꇤꁨꇐꊇꁧꀊꂥꃅꀻꎆꌠꄹꇙ，ꐳꃅꋬꂻꍏꇩꋈꄻ，ꊻꂷꊇꁧꀊꂥꃅꀻꎆꌠꊥꎆ，ꎍꐽꃅꅉꀨꄉꉻꁧꃤꃅꌠꐽꏡꈴꌠꄹꎆꌶ。

ꐊꈴꃀꄜꎼꇁꇬ，ꎆꏣꐧꋦꀻꎆꌠꐊꑷꃅꀊꃴꉹꏮꌠꐳꀥꇱ，ꎔꃨꌠꍏꇩꋈꄻ。ꒉꆧꁧꃴꌠꆹꐎꁧꏂꁧꉬꌠꉪꉻꑌꈬꌋꆀꃄꄻ，ꌋꋊꑞꅉꑟꌋꐮꐽꌠꌌꈻꌬꅍꃅꄉ，ꋮꄮꃅꌋꊨꒊ、ꍍꊨ、ꃴꆧꍔꐯ、ꉀꎆꌠꄹꎆ，ꒆꉻꋬꂻꇊꑴꄻꈫꈈ，ꀊꃴꀻꎆꇙꊋꄻꀉꇨ。ꐪꊛꄉꃹꅼꃅꍍꆀꄴꏲꈢꇓꀖꌠꌋꆀꒆꉻꉻꑫꄻꃪꌠꄹꎆ，ꐳꃅꀊꏀꉹꌠꊋꀦꉻꑫꋈꄻ，ꏣꀋꑌꃅꎍꐽꃅꌋꋊꑞꅉꑟꌠꄹꎆꌋꆀꃅꇫꑟ，ꐳꃅꀊꃴꒃꅐꐥꐨꐤꄟꏓꐛꌶ。

ꐊꈴꃀꄜꎼꇁꇬ，ꇩꏤꋬꂻꉻꑫꌋꆀꄐꊋꐛꏀꈴꌠꄹꎆ，ꑟꐨꀊꅰꀊꂥꌠꋬꂻꍏꇩꋈꄻ。ꀋꎪꀋꑴꃅꉻꄜꇩꏤꋬꂻꉜꐨꃄꌬ，ꍏꇩꐛꐨꐧꋦꉪꏦꐧꋦꏱꄻꈝꃀꍬ，ꐧꋦꍅꁍꀕꇈꊱꁨꌠꄉꀧ。ꇩꏤꋬꂻꉻꑫꄻꐛꒆ，ꊋꀥꇱꄉꀋꉬꀋꉆꁁꏯꇩꏤꋬꂻꄐꊋꋈꄻ，ꄉꉻꋬꂻꏱꄻꑟꐨꉀꐕ，ꐧꋦꏱꄻꉻꑫꄻꉾꃪꌶ。

ꐊꈴꃀꄜꎼꇁꇬ，ꏤꈉꈐꃅꂽꄻꐛꋍꉐꈎꐛꌠꉈꈽꁻꌐꃅꇫꑟ，ꊇꁧꀊꂥꃅꇩꐏꌋꆀꂽꐛꏀꈴꌠꄹꎆ。ꑮꏣꀻꂽꀉꇨꉪꇐꃄꌬꈴ，ꃅꋊꀊꏀꋎꌠꂽꌤꄐꇐꏤꁈꌐꏦꃄꌬꈴ，ꄈꏓꂱꂽꏭꀋꎪꃅꏲꂠꌠꌭꈬ，ꏮꊈꍗꑮꆽꎍꄹꏦꃄꌬꈴ，ꇩꐏꌋꆀꂽꐛꏀꈴꌠꀊꏀꌠ“ꌕꁘꃅꈴ”ꌠꄐꇐꏤꁈꇬꈴꄉ，ꍔꍞꌌꂽꋈꄻ、ꄺꀱꄉꂽꄻꀉꇨ、ꈆꑪꇮꇐꌌꂽꄻꀉꇨ、ꌧꊿꌌꂽꄻꀉꇨ、ꏦꃤꇬꈴꄉꂽꏱꄻꌠꄹꎆ，ꋍꁁꏯꆏꉈꈽ、ꋍꁁꏯꆏꌉꊭꌉꄐ、ꋍꁁꏯꆏꋈꄻ，ꐳꃅꏸꏧꃅꐙꈴꌗꃅꐙꀑꊋꃅꐙꌠꐮꏓꐊꄉꀻꎆ，ꇩꏤꌅꀨ、ꋬꂻ、ꀻꎆꈲꁧꐏꁇꄐꇐꏤꁈꄐꊋꉀꐕ。ꐳꃅꂴꅑꌠꌉꈿꊋꃤꋈꄻ，ꂽꌤꏱꄻꐛꏀꈴꌠꄹꎆ，ꋍꃱꃅꐙꌠꇩꏤꄐꇐꏤꁈꉻꑫꌋꆀꄐꊋꄻꈫꈈꉀꐕꌶ。

ꐊꈴꃀꊡꀱꇬ，ꄈꑭꊂꇩꏤꑭꊂꊿꋅꈁꐥꌠꏓꂱꃅꋯꑌꌊ“ꊯꉬꉬ”ꄐꎖꌠꃅꇫꑟꌠꎁꃅꉈꈽ。ꄈꅿꑴꅉꇝꂱꌠꌌꐧꋦꇝꂱꌠꄐꏁꌠꌭꈬ，ꌦꀳꏿꄉꐊꑷꃅꏦꇨꃅꄈꏱꄻꌠꄹꎆ，ꄈꍔꍞꏲꂠꊋꃤ、ꉪꇐꄐꏁꊋꃤ、ꉹꁌꊥꇫꊋꃤ、ꐧꋦꇳꍝꊋꃤꄻꀉꇨ，ꄈꎆꏣꐧꋦꀻꎆꌠꇬꏲꂠꌠꄐꊋꌋꆀꑟꐨꉀꐕ，ꍏꇩꈁꏦꐛꏀꈴꌠꄹꎆꌠꎁꃅꊋꃤꀉꇨꌠꏓꋧ。ꄈꍏꑷꏓꋧꋍꃱꃅꏲꂠꌠꌭꈬꌋꆀꊋꀥꇱ，ꐧꋦꉪꏦꋯꁦꏦꏲꋈꄻꌠꄹꎆ，ꋒꐯꋒꃅꐧꋦꑭꊂꃅꇶꇤꊋꇤꄉꍏꇩꈁꏦꐛꏀꈴꌠꋈꄻꌠꏣꀋꑌꐨꑴꇙꐨꀹꄻꐨꄖꄑꎼꇁꌶ。ꑣꇤ、ꀎꂱꀊꉗꃅꌄꆣꎍꐽꌠꊥꎆ，ꎿꋮꑍꄷꐮꃆꂮꄮꐽꃅꀻꎆꌠꄹꇙ、ꁍꇩꏓꋍꃱꃅꌠꌤꑘꀉꒉꌠꄹꎆ，ꃰꊿꊫꂫꐮꐊꄜꏓꄻꌠꄹꇙ。

ꐊꈴꃀꄐꌐꎼꇁꇬ，ꐊꈴꃀꉌꊈꌶꄻꋒꃄꌬꋒꌠꆹꀋꃅꋋꇅꇬꌋꆀꋌꊂꋍꊭꇬꄈꑭꊂꇩꏤꑭꊂꍔꍞꂿꃆꀉꒉꀊꂾꐘꉬ。ꋍꑞꋍꑵꃄꄟꇬꈴꄉ，ꐊꈴ꒜ꉌꊈꌶꄻ、ꉉꄜ、ꄜꉺꌠꊥꇫꋒꄉ，ꄈꑭꊂꐧꋦꑭꊂꃅꐊꈴꃀꉌꊈꌧꐚꋒꌶ。ꃶꐚꃅꐊꈴꃀꉌꊈꃄꌬꑞꅉꑟꌠꒃꉇꋒ，ꀋꎪꀋꑴꃅꊇꁧꀊꂥꃅꀻꎆꌠꄹꇙ，ꐳꃅꀻꎆꐛꊂꀊꏀꌠꏓꄻ，ꏓꂱꈁꐥꌠꃅꐯꇯꌣꈚꌠꑭꁘꏟꈯꃅꐕꎼꆹꌠꄹꇙ，ꀊꅰꉾꃪꃅꀻꎆꌋꆀꋬꂻꌠꏓꇲ，ꏓꇲꃅꎆꏣꋈꄻꌠꌋꆀꋍꑞꋍꁁꏯꌤꃅꌠꄹꎆꄉ，ꀑꐱꃅꐧꋦꉪꏦꐛꏀꈴꌠꃅꇫꑟꌠꎁꃅꅉꃀꌆꈬꌶ。

ꐊꈴꃀꊡꀱꇬ，ꇩꏲꇬꀋꎪꃅꂴꄈꏲ，ꄈꌄꆣꑲꆀꇩꏤꀉꇨꄎ。ꄈꏲꄈꄻꇬꀊꅰꃅꇿꋌꐥꆏ，ꎆꏣꐧꋦꀻꎆꌠꏦꀧꌠꀊꅰꃅꊋꑌꇁ。ꀋꎪꃅꐥꍂꃅꈝꃀꇬꐺꌠꇨꊈꌋꆀꌦꀳꏿꄉꃅꇬꎷꌠꌌꄉ，ꈍꄮꑌꐊꑷꃅꏦꇨꃅꄈꏲꌠꄹꎆ，ꏟꈯꃅꄈꅿꑴꅉꇝꂱꇖꐨꃅꌊꑞꅉꑟ，ꄈꃅꇏꋈꄻꌠꅉꀕꃅꃅꀊꉗꃅꇿꋌꐥꌠꄹꎆ，ꀋꇙꀋꑐꃅꍹꈔꌠꏭꁏꉈꈽꌠꃅꄉ，“ꊯꉬꉬ”ꊬꌠꎆꏣꐧꋦꀻꎆꁻꌐꃅꇫꑟꌠꎁꃅꄉꀧꅍꀉꇨꌠꇲꁵꌶ。

ꐊꈴꃀꆹꀋꃅꋋꇅꇬꃅꒊꃅꇁꌋꆀꂿꃆꎥꃪꀐ，ꀋꎪꃅꋋꈓꇬꎆꏣꐧꋦꀻꎆꁻꌐꃅꇫꑟꌠꊡꀱ。ꐪꊛꄉꊒꌸꃅꄈꍏꑷꁈꏤꄐꁆꌠꃅꑞꅉꑟ，ꊋꇤꄉꃅꅍꊌꌠꄻꎍꐽ、ꎆꏂꑘꄻꎍꐽ、ꃷꎏꄻꎍꐽ、ꂴꄐꄉꌠꄻꎍꐽꃅꄉ，ꎆꏣꅉꀨꃅꍜꒃꌫꋒꃅꄉ，ꎆꏣꀱꉾꃪꇁꌠꆸꄟꄻꈫꈈꍔꀺꌶ。ꉻꒉꏱꁈꆏꐪꊛꄉꊋꇤ、ꄮꈉꋭꋽꃅꊋꇱ，ꎆꏂꑘꇇꀨꄏꐓꏱꁈꃅꑞꅉꑟꋒ，ꃹꅼꃅꌬꈧꄖꄑꌠꌐꐘꃅꐨꃄꌬ，ꅉꂫꊐꌠ“ꌕꏦꀧ”ꂫꑟꀧꈬ，ꏣꀋꑌꃅꋭꋽꃅꃅꄷꍔꃚꎝꃆꃨꆰꐨꋊꑣꇧꎭꌶ。

ꐊꈴꃀꄐꌐꎼꇁꇬ，ꃶꐚꃅꉹꁌꐥꐨꏦꀧꌠꒃꉇꋒ，ꈴꈜꀉꑌꏢꃅꊋꂫꅤꀖ，ꊋꀥꇱꄉꃅꈉꄻꎍꐽꃅꄉꃅꅍꊌꌠꊥꎆꌠꌤꃅ，ꊿꀋꉬꀋꉆꁥꌠꎍꐽꃅꃅꅍꊌꌠꊥꎆ，ꃄꎆꎝꁯꌠꏱꄻꊋꃤꀉꒉꃅꇱ，ꊋꀥꇱꄉꅉꀨꄉꉻꁧꃤꃅ，ꏓꂱꉹꁌꃛꊸꊋꋠꐒꊀꉘꇉꌠꌤꃆꂥꀘꋒꌶ。ꃶꐚꃅꉮꌸꊂꋈꀱꄺꀱ、ꉮꌸꉹꁌꁆꄻꇬꏀꌋꆀꐥꐨꏦꀧꌤꃅꌠꒃꉇꋒ，ꉮꌸꉹꁌꁳꊷꆣꀕꃅꃅꋆꈳꅐꌠꄉꀧ。

ꐊꈴꃀꊡꀱꇬ，ꋬꂻꃅꒃꅐꌠꌋꆀꎍꐽꀧꌋꃅꌠꌤꃅꋒ，ꋬꂻꃅꒃꅐꆽꎍꐨꍅꑆꍅꈬ，ꏦꇨꃅꋍꑞꋍꐘꍞꏲꄹꏦꃅꑞꅉꑟ，ꏟꈯꃅꌤꆿꀉꒉꀊꂾꃅꅐꌠꄴꏮꌋꆀꋎꍅꌶ。ꋠꇐꁬꋌꋬꂻꃬꏣꇬꃅꍞꏲꌠꀉꇨꇱ。ꃹꅼꃅꐮꄙꐨꏟꃆꏈꑘꍤꄻꋊꑣꇧꎭ，ꐧꋦꋬꂻꉻꄜꃅꄴꏮꋎꍅꌠꊋꀥꇱ，ꏦꃤꇬꈴꄉꋍꑞꋍꉹꏦꐆꑽꃤꐆꌠꏭꇇꇩꍈ。ꊋꀥꇱꄉꈋꍣꄐꏁ，ꇿꋌꐥꃅꉪꐨꐛꉻꃨꆰꐨꄴꏮꋊꑣ。

ꐊꈴꃀꐰꏤꄉꇬ，ꍈꌜꂱꀥꇱꌊꍏꇭꍏꑷꂽꌤꊈꑼꉼꃛꍗꑮꃅꄉ。

ꐊꈴꃀꆏꄈꏦꏤꐪꇬꈴꄉ，ꐰꏤꄉꇬꍏꑷꊈꑼꉼꊁꇱꊈꑼꒄꉼꊉ、ꂷꉴꍰ、ꊆꏧ、ꊆꑭ、ꊆꑿꉼ、ꊆꄝꇽ、ꊆꑟꊈ、ꊈꄧ、ꄓꑴꃶ、ꄓꑩꂱ、ꇑꉼꊛꇱꌊꍏꑷꊈꑼꉼꊈꑼꃅꄉ。

ꐊꈴꃀꆏꍏꇭꍏꑷꍬꏦꍤꄻꊈꑼꉼꄤꏓꏧ、ꏢꑣꏮ、ꅿꏃꌙ、ꑸꃔꌜ、ꍗꍝꌙꀉꆈꃅꍬꏦꐆꏦꃤꐆꌠꌤꃆꃆꂮꍤꄻꅇꄜꌠꌌꍤꇖꇈꉌꃹꈴꄉꀐ，ꍏꇭꍏꑷꂽꌤꊈꑼꉼꉿꊉꄏ、ꂴꉸ、ꉿꉼꏮ、ꊆꑪꀘ、ꆀꑤꑸ、ꏿꎽꄬ、ꑼꉸꍞ、ꊆꍫꆀ、ꍈꃗꍏꀉꆈꃅꍬꏦꐆꏦꃤꐆꌠꌤꃆꃆꂮꍤꄻꅇꄜꌠꌌꍤꇖꇈꉌꃹꈴꄉꀐ，ꍏꑷꍔꍞꏳꂴꏭꏤꄻꄉꌠꉿꊉꄏ、ꂴꉸ、ꄤꏓꏧ、ꏢꑣꏮ、ꉿꉼꏮ、ꊆꑪꀘ、ꆀꑤꑸ、ꏿꎽꄬ、ꑼꉸꍞ、ꊆꍫꆀ、ꅿꏃꌙ、ꑸꃔꌜ、ꍗꍝꌙ、ꍈꃗꍏꄈꐴꇇꉈꋊꇧꎭꃅꅓꀞꌠꏚꍆꀐ。

ꐊꈴꃀꇳꍝꇬ，ꄈꑭꊂꂽꑭꊂꇩꏤꑭꊂꊿꋅꈁꐥꌠꏓꂱꆏꀊꅰꃅꑖꑟꃅꋯꑌꌊꐋꀨꑮꏣꀻꈯꄜꃅꄉꌠꄈꍏꑷꈭꇍꄉ，ꀑꐱꃅꐧꋦꉪꏦꐛꏀꈴꌠꃅꇫꑟꌠꎁꃅꐯꇯꉈꈽ，ꀋꆏꃅꍏꇩꈁꏦꐛꏀꈴꌠꌌꐊꑷꃅꇩꏤꀉꇨꌠꋈꄻꌠ、ꊿꋅꀱꌄꆣꇁꌠꌤꑘꇰꀋꃀꌠꄹꎆꌠꐛꊂꀊꏀꌠꀹꄻꌶ。